46-12g    8 Ògmhios 2012

Tha an Oifis ri Malairt Chothromach air toraidhean a' chomhairleachaidh mu mhargaidhean ann an coimhearsnachdan iomallach air feadh na Rìoghachd Aonaichte fhoillseachadh.

Tha mu leth-mhillean neach a' fuireach ann an sgìrean iomallach anns an Rìoghachd Aonaichte. Thog an fheadhain a thug freagairt air gairm-fianais OFT ceistean mu phrìsean àrda air connadh is grosaireachd, seirbheisean-lìbhrigidh a tha cuibhrigte no cosgail, còmhdhail phoblach nach eil math gu leòr, luas mall air an Lìon agus còmhdach fònaichean-làimhe nach eil ach suarach.

San fharsaingeachd, fhuair an Oifis a-mach gum faod prìsean nas àirde agus roghainn chuibhrigte sna sgìrean iomallach seo èirigh à ìre ìseal de reic agus farpais lag le lèir-shealbhachd ionadail aig cuid de ghnìomhachasan. Nuair nach urrainn do mhargaidhean ionadail ach ìre bheag de luchd-solair a chumail, faodaidh e bhith doirbh do luchd-cleachdaidh buannachdan a thoirt à farpais leanmhainneach. Tha an Lìon a' tairgse barrachd is barrachd chothroman gus cothrom fhaighinn air raon nas fharsainge de luchd-solair ach faodaidh gnìomh a bhith doirbh gus a dhèanamh cinnteach nach tèid srian a chur ri seo le cumhaichean is cosgaisean an lùib lìbhrigidh.

A bharrachd air a cuid chumhachdan gus aghaidh a thoirt air cartels agus duilgheadasan eile ceangailte ri farpais agus aghaidh a thoirt air briseadh lagh an luchd-chleachdaidh, tha àite aig an Oifis cuideachd ann a bhith a' sgrùdadh mhargaidhean agus ag agairt mun àite chudromach a tha aig roghainn luchd-cleachdaidh. A' cur feum air an raon fharsaing seo de chumhachdan, ghabh an Oifis ceuman, agus tha i gan daingneachadh a-nis, gus aghaidh a thoirt air na ceistean a thogadh, nam measg a' sgrùdadh chlaonaidhean ann an prìsean a' chonnaidh ann an eileanan na h-Alba, a' foillseachadh stiùiridh mu aontaidhean co-obrachaidh ann an tuathanachas agus a' strì ri ceistean mu dhìon luchd-chleachdaidh sna roinnean ri ola-teasachaidh is gas.

Tha an Oifis cuideachd ag obair le Inbhean-malairt na Gàidhealtachd gus dìon luchd-chleachdaidh a leasachadh mu sheirbheisean-lìbhrigidh agus a' cur ris an stiùireadh aice do luchd-reic a bhios a' riarachadh choimhearsnachdan iomallach a thaobh mar a ghèillear ri Riaghailtean mu Reic air Astar. Tha i cuideachd a' gabhail gnothaich ri puingean a rinneadh ann am freagairtean mu bhrisidhean ionadail a dh'fhaodadh a bhith ann air an lagh mu fharpais.

Tha an aithisg ag aideachadh nach eil na duilgheadasan uile a chaidh a chomharrachadh an taobh a-staigh raon-ùghdarrais na h-Oifis ri linn, mar eisimpleir, nach buin iad ri giùlan mì-laghail no an aghaidh farpais. Tha an sgrùdadh air cuideam a chur air tionnsgnaidhean ann an coimhearsnachdan ionadail a bheir aghaidh air na dùbhlain - mar eisimpleir, luchd-cleachdaidh a' cur ri chèile ann an 'clubaichean-ceannaich' gus prìsean a lùghdachadh, no a' stèidheachadh iomairtean sa choimhearsnachd gus caitheamh is prothaid ionadail a chumail sa choimhearsnachd. Tha i cuideachd air dòighean a shònrachadh sam faod gnìomhachasan, riaghaltas (an dà chuid ionadail is nàiseanta) agus com-pàirtichean ann an cur-an-gnìomh, a bharrachd air an Oifis fhèin, àite a gahbhail còmhla gus a dhèanamh cinnteach gum bi gnìomhachas a' gabhail ri luchd-cleachdaidh a rèir Cothrom na Fèinne.

Thuirt Kyle Brand, Stiùiriche OFT:

'Tha a' ghairm-fianais air leigeil fhaicinn mar a bhios duilgheadasan a thaobh prìs, roghainn is cothrom air bathar is seirbheisean a' càrnadh suas do luchd-cleachdaidh is do ghnìomhachasan ann an sgìrean iomallach. Faodaidh sinn mìneachadh a thoirt air mar a shoirbhicheas le dòighean-dèiligidh amalaichte gus an obraich margaidhean gu math - no co-dhiù nas fheàrr - don fheadhainn an an sgìrean iomallach.

'Chan eil fuasgladh furasta an taobh a-staigh cumhachdan na h-Oifis ach tha àite againn, agus aig gnìomhachasan, coimhearsnachdan agus buidhnean-riaghaltais.

'Gabhaidh is ghabh sinn gnìomhan sinn fhèin gus aghaidh a thoirt air na ceistean seo agus sgaoilidh sinn an aithisg againn gu roinnean-riaghaltais, ùghdarrasan ionadail, buidhnean-coimhearsnachd is eile a chuidicheas gus a dhèanamh cinnteach gun cuir an comhairleachadh seo cruth air còmhraidhean mu phoileasaidh. Cuiridh e cruth cuideachd air obair na h-Oifis san ùine air thoiseach, thar raon làn nan cumhachdan againn.'

NOTAICHEAN

1. Sa Ghearran 2012, thug an OFT cuireadh do luchd-cleachdaidh is do ghnìomhachasan sna sgìrean seo innse mu na dh'fhiosraich iad gus a chur ri tuigse air mar a bhios prìsean, roghainnean is cothrom air bathar is seirbheisean fo bhuaidh na h-iomallachd. Tha barrachd fiosrachaidh mun tionnsgnadh seo ri fhaotainn air duilleag an tionnsgnaidh. 
2. Mar fhreagairt air a' ghairm-fhianais aice fhuair an OFT 500 de fhreagairtean bho dhaoine, bho bhuidhnean poblach, bho riochdairean air an taghadh, bho chompanaidhean agus bho eagrachaidhean saor-thoileach.